ក្រុងបានលុង ជា​បេះដូង ​នៃ​ខេត្ត​រតនគិរី ភូមិភាគ​ឦសាន​នៃ​ប្រទេស​កម្ពុជា។ ទោះបីជាក្រុងមានទំហំតូចល្មមក៏ដោយ ក្រុងបានលុងបានផ្តល់នូវចំណុចចាប់ផ្តើមសម្រាប់ការផ្សងព្រេងទៅកាន់ទេសភាពដ៏ស្រស់បំព្រងនៃខេត្តរតនគិរី។

ទឹកជ្រោះកាចាញ ជារមណីយដ្ឋានធម្មជាតិដ៏ស្រស់ត្រកាលមួយដែលមានចំងាយប្រមាណ៧គីឡូម៉ែត្រពីក្រុងបានលុង ជារមណីយដ្ឋានធម្មជាតិដែលតែងតែទាក់ទាញភ្នែកភ្ញៀវទេសចរគ្រប់ៗរូបឱ្យទៅទស្សនាទីនោះ។ ទឹកធ្លាក់នេះស្ថិតនៅចំកណ្ដាលព្រៃភ្នំភ្ជាប់ដោយអូរ និងចម្ការកៅស៊ូនៅតាមដងផ្លូវធ្វើដំណើរទៅកាន់ទីនោះ។ ទេសចរទាំងអស់ត្រូវចុះតាមជណ្ដើរប្រមាណ៧២ កាំ ទៅក្រោម ក្រោយពីដើរកម្សាន្តលេងតាមស្ពានយោលដែលលាតសន្ធឹងនៅពីមុខចរន្តទឹកធ្លាក់។ នៅចំណុចខាងក្រោមនេះ មានដើមឈើធំៗដែលអាចផ្តល់ជាម្លប់ដល់ការសម្រាកលេង ឬហូបចុកចំណីអាហារ។ ចំណែកនៅផ្នែកខាងលើក្បែរចំណុចទឹកធ្លាក់ មានកន្លែងលក់ដូរចំណីអាហារ ភេសជ្ជៈ រួមទាំងវត្ថុអនុស្សាវរីយ៍ផ្សេងៗសម្រាប់អ្នកទេសចរដែលទៅ កម្សាន្តទីនោះ។

បឹងកន្សែងជាបឹងធម្មជាតិ និងជាកន្លែងដ៏ពេញនិយមមួយរបស់ខេត្ដរតនគិរី។ មនុស្សម្នាដែលទៅលេងនៅបឹងនេះដើម្បីទស្សនាទេសភាពធម្មជាតិដ៏ស្រស់ត្រកាល និងដើម្បីរំសាយអារម្មណ៍បន្ទាប់ពីធ្វើការអស់កម្លាំងពេញមួយថ្ងៃ។ កាលពីសម័យមុននៅតំបន់បឹងកន្សែង សម្បូររទៅដោយរុក្ខជាតិគ្រប់ប្រភេទ ផ្ការីកចោលក្លិនពិដោរក្រអូបឈ្ងុយឈ្ងប់ ចំណែកឯនៅក្នុងផ្ទៃបឹងវិញពោរពេញទៅដោយសារាយ ព្រលិត និងមានទឹកត្រជាក់ថ្លាយង់។បឹងកន្សែងស្ថិតក្នុងភូមិអូរកន្សែង ឃុំបឹងកន្សែង ស្រុកបានលុង ខេត្តរតនគីរី។បឹងកន្សែង មានចម្ងាយប្រហែល 1គីឡូម៉ែត្រ ពីទីរួមខេត្ដរតនគិរី ដោយធ្វើដំណើរចេញរង្វង់មូលវិមានឯករាជ្យតាមផ្លូវលេខ 27 ទៅត្រង់នោះអ្នកនឹងទៅដល់បឹងនេះ។

ព្រះអង្គធំ ភ្នំឥសីបតមៈ ជារម្មណីយដ្ឋានបែបពុទ្ធសាសនា និងជាទីសការៈបូជារបស់ភ្ញៀវទេសចេណ៍ដែលមកកំសាន្តខេត្តរតនគិរី ចូលមកអុជធូបសុំសេចក្តីសុខសប្បាយ រម្មណីយដ្ឋាននេះមានចំងាយប្រមាណ១គីឡូពីរង្វង់មូលក្រុងបានលុង នៅពេលភ្ញៀវទេសចរណ៍ឡើងទៅដល់កំពូលភ្នំមានអារម្មណ៍ស្រស់ស្រាយជាមួយខ្យល់ធម្មជាតិ គ្រប់គ្នាអាចមើលឃើញក្រុងបានលុងទាំងមូល និងឃើញដំណាំកសិផលផ្សេងៗរបស់បងប្អូនប្រជាពលរដ្ឋយ៉ាងខៀវស្រងាត់ នារដូវវស្សានៅលើកំពូលភ្នំមានអាកាសធាតុត្រជាក់ និងចុះអព្ទខ្លាំង។

គុជវារី ជារម្មណីយដ្ឋានកែឆ្នៃបែបធម្មជាតិ ដែលមានទេសភាពស្អាត ហើយមានបឹងកាឡូសម្រាប់ស្នាក់នៅផងដែរ ដែលមានចំងាយប្រមាណ៥គីឡូ ពីក្រុងបានលុង។

បឹងយក្ខឡោម ជាបឹងធម្មជាតិមួយ ដែលកកើតពីបន្ទុះភ្នំភ្លើង មានចំងាយប្រមាណ២គីឡូពីក្រុងបានលុង។